தழும்பு

புளியங்குளம் சாலையில்
வந்த ஹோண்டா ஷைன்
இருசக்கர வாகனத்தை தான்
இடை மறித்து
அவை கடந்து கொண்டிருந்தன

சற்றே பட்டையான
ஃபிரேமுடைய தடிமனான
கண்ணாடி,
அரை வழுக்கை போக
மீதமுள்ள முடிக்கு
எண்ணெய் வைத்து
படிய வாரிய தலை,
கோடு போட்ட
வெளீர் காபி நிற
அரைக்கை சட்டை,
கனமான டைட்டன்
கைக்கடிகாரம்,
நீலம் சிவப்பென
சட்டைப்பையில் இரண்டு
ரெனால்ட்ஸ் பேனா,
பிரவுன் நிற
பட்டையான வார்
வைத்த செருப்பனிந்த
ஐம்பதை நெருங்கும்
அந்த இருசக்கர
வாகனத்திலிருந்தவர்,
என்னைப் பார்த்ததும்
அசெளகிரியமாய்
குறுகினார்

ஆறாவது படிக்கையில்
அவரது பிரம்பால்தான்
படிப்பே வேண்டாமென
பண்ணையில் சேர்ந்தேன்.
இன்று ஆடுகளை
விரட்ட கம்பால் அடித்தது
அவரது முதுகிலும்
தழும்பாகிப்போகுமோ?

நிஜம்

மூன்று சென்டில் வீடு
இரண்டு ஏக்கர் நிலத்துடன்
ஒரு லட்சம் ரொக்கம்
கணக்கு பிள்ளையின்
மகள் திருமணத்திற்கு
பரிசாய் குடுத்த
பெரிய பண்ணை

சாந்தி காலனி
நான்காம் சந்து
மூன்றாம் தளத்தில்
இரண்டு மாதமாய்
வீட்டு வாடகை 
கொடுக்கவியலா 
நலிந்த நடிகர்

தரம்

இரண்டாம் சிரமுடைய
இனம் ஏதும் உண்டோ

மூன்றாம் கரமுள்ள
மதத்தினர் யாரும் உண்டோ

ஏழாம் அறிவுடையோர்
எட்டுத்திக்கில் உண்டோ

சிவப்பில்லா குருதியுடன்
மேன் மக்கள் உண்டோ

சாவா வரம் பெற்ற
சாதியினர் உண்டோ

பசியென்னும் பிணியில்லா
மாந்தர் மண்ணில் உண்டோ

மனிதர் அனைவருக்கும்
சமமாய் எல்லாம் இருக்க

சமயம் சாதி சன்மார்க்கம்
மொழி இனம் நிறமென

தரம் பிரித்து வாழ்வது
தரக்குறைவன்றோ

எதைப்பற்றி எழுதுவது

பார்வை தொலைத்து
கையேந்துபவனா
கண்கள் பார்த்தும்
கடப்பவனா

முதுகு வளைந்தும்
முழம் போடுபவளா
குறைக்கச் சொல்லி
விலை பேசுபவனா

பசியின் பிடியில்
திருடுபவனா
திருட்டுக் கொடுத்து
கதறுபவனா

பெண்மையைப் பறித்த
மிருகத்தையா
கற்பே அடகாகும்
வறுமையையா

நதிகள் நடத்தும்
அரசியலையா
நிதிகள் எழுதும்
தேர்தலையா

கடலில் எல்லை
கடப்பவனா
கடப்போர் உயிரைப்
பறிப்பவனா

கழுத்தறுக்கும் சாதிய
கத்தியையா
துடித்திறக்கும் சாமானியன்
காதலையா

கனவைப் பறிக்கும்
தேர்வினையா
கனவிழந்தோர் ஆறாத்
துயரினையா

இதில் எதைப்பற்றி
எழுதுவது
கேள்விகள் என்னுள்
எழுகிறது

சுத்தம் இருப்பினும் மருத்துவம்

மணல் குவித்து
வீடு கட்டுவதோ
நாற்றுகளாய்
சேற்றில் குதிப்பதோ
களிமண் குழைத்து
பொம்மை செய்வதோ
புழுதிக் காட்டில்
சடுகுடு ஆடுவதோ

குழாயடி நீரில்
தாகம் தணிப்பதோ
அணில் கடித்தெறிந்த
கொய்யாவோ
கிழவி உப்பிலிட்ட
நெல்லியோ

கவரில் அடைத்த
குழல் வத்தலோ
கண்ணாடி பாட்டில்
வழியே சிரிக்கும்
தேன் மிட்டாயோ
தேங்காய் பர்பியோ

மிதிவண்டி மீதுவரும்
சேமியா ஐசோ
வெங்காய சமோசாவோ
கிரிஜா அக்கா
கீரை வடையோ
முருகன் கடை
முருகல் தோசையோ

சுத்தமற்றது எனவும்
சுகாதாரமில்லை எனவும்
குளிரூட்டிய அறையில்
ஐ-பேடில் விளையடி
கண்ணாடி சுவரெழுப்பிய
கடைகளிலேயே உண்டு
சுத்திகரிப்பானில்
கைதுடைத்து
சுத்திகரிக்கப்பட்ட
நீரருந்தியவனுக்கு

எப்படி வந்ததென்றே
தெரியவில்லை
டஸ்ட் அலர்ஜியும்
புட் பாய்சனிங்கும்.
நாட்டு மருந்து
கடைக்காரர் தான்
வழி சொன்னர்
அந்த ஆறடுக்கு
மருத்துவமனைக்கு.

நாடே காடாகும்

நிலம் நீர்
மட்டுமின்றி
உரம் உழைப்பு
மட்டுமின்றி

திங்கள்கள் சில
அதிலும்
இன்னல்கள் பல.

மழையோ வெயிலோ
தவறினாலும்
தாமதித்தாலும்

கேணியோ குளமோ
தரை தெரிந்தாலும்
கரை புரண்டாலும்

ஒப்புக்கு தீர்ப்புகளும்
ஒப்புக்கொள்ளா
நாடகங்களும்

இயற்கையின் விதி
அரசியல் சதி
விளைவுகள் என்னவோ
விளைச்சலில் தான்.

முதலையும் கொடுக்கா
கொள் முதலைகள்
பசுவை அழித்து
பசுமை யுக்திகள்

தில்லியில் கூவியும்
செவி கேளாமல்
அரை நிர்வாணத்தையும்
கவனிக்காமல்

வாழ்வியல் விவசாயத்தில்
வர்த்தக விஷமேறி
ஜனநாயகம் நுரைதள்ளும்.

பால் பழம் பல்வகை
தானியங்களுடன்
அரிசியும் அரிதாகும்
நாடே காடாகும்.

அம்முவாய் மாறிய பிங்கி

அழுக்கு தேகத்தில்
ஒற்றைக் கண்ணுடன்
அறுந்து தொங்கும் காதுமாய்
குப்பையில் கிடந்த
அந்த கரடி பொம்மை

தான் முன்பிருந்த
அடுக்குமாடி குடியிருப்பின்
பதினெட்டாம் மாடியில்
குளிரூட்டப்பட்ட அறையும்
வசதியான மெத்தையையும் விட

சூரியனுன் சந்திரனும்
எட்டிப் பார்க்கும் கூரையுள்
ஓரம் கிழிந்த பாயும்
துணிகளை சேலையுள்
முடிந்த தலையணையும்

மூக்கொழுகும் அந்த
பரட்டைத்தலை சிறுமியும்
அவள் ஊட்டும் பழையதும்
பிடித்துத்தான் போயின
அம்முவாய் மாறிய பிங்கிக்கு.

பெரியார்

அன்றவன் கல்வியை
பொதுவாக்கினான்,
அறிவைப் புகட்டியே
வேற்றுமை வேரருத்தான்

இன்று குளங்கள்
மட்டும் பொதுவாகவில்லை
கோவில்களில் மட்டும்
கதவு திறக்கவில்லை

சவரம் செய்தவர் மகன்
சார்க் உச்சி மாநாட்டில்
ஆடைகள் வெளுத்தோர்
ஆடை வடிவமைப்பில்

கல்வி பறிக்கப்பட்டோர்
கல்லூரி பேராசியர்களாய்
பொதுவழி மறுக்கப்பட்டோர்
விண்வெளி ஆராய்ச்சியில்

பொறியியலும் மருத்துவமும்
கிடைக்கப் பெற்றாலும்
மலமள்ளும் இழிநிலையும்
இருக்கத்தான் செய்கிறது

பொதுக்குழாய் நீரும்
பொதுவழியில் தேரும்
வெற்றிதான் எனினும்
போதாது

சகலமும் சமமெனும்
நாளது வரும்வரை
பெரியாரின் விதைகள்
ஓயாது