அரிதாரம்

அவதாரம் போலே
அரிதாரம் பூசி
அரை வயிறு நிரப்ப
அல்லல் வாழ்க்கை

பண்ணிசைத்த பலருக்கு
நேரில் வந்த அவனோ
என் இசைக்கு இதுவரை
கனவிலும் கூட இல்லை

நீளமான சாலையிலே
கடும் வெயிலில் பயணம்
நீல நிற வியர்வை
என் அரிதாரம் கலையும்

சோதனை வாழ்க்கையினை
வேதனையுடன் சொல்ல
செவிசாயா கூட்டத்தில்
நாவறண்டு போகும்

அரை கதவு இடுக்கினிலே
தலை எட்டி பார்க்கும்
அரையணா தந்துவிட
அரைமனது மறுக்கும்

எலும்பு தெரியும்
தெரு நாயும்
என்னை கண்டதும்
குரைக்கும்

கடவுளே நீ
பூமி வந்தால்
என்நிலை தான்
உனக்கும்

சிலுமிஷச் சிறுவர்கள்
சீண்டியும் பார்ப்பார்
கடவுளாய் கிடைப்பதனால்
புன்னகையே உதிர்ப்பேன்

ஈர மனங்களை
காணாத நாளில்
ஈரத்துணி தான்
துணையாகிப் போகும்

வருகின்ற சில்லரையில்
வண்ணங்கள் வாங்கி
எஞ்சியதில் கிடைப்பதெல்லாம்
அரை கட்டு பீடி

சிலையாகிக் கிடந்தாலும்
சில்லரைகள் சேரும்
உயிராகி உலவுவதால்
இன்னல்கள் தான் நேரும்

தோற்றமோ பன்னிறத்தில்
பொலிவுடனே இருக்க
வாழ்க்கையோ இதுநாள் வரை
நிறமின்றி இருட்டில்

படம்: ஓவியர் ரவி
https://www.facebook.com/ravi.artist.98