குழல்

வாழ்க்கை இதுநாள் வரை
அவனுக்களித்த
சிறு சிறு சந்தோஷத் துகள்களை
சோகப்பெட்டகத்தின்
ஒரு மூலையில்
சேமித்தது வைத்திருந்தான்.

துன்பம் எதிர்ப்படும் போதெல்லாம்
அத்துளிகளிலிருந்து
ஒரு துளி எடுத்து
மனதெங்கும் பரப்பி
சிந்தையிலும் நிறுத்தி

நுரையீரல் கக்கும்
கரிவளிக்கும் உயிர் செலுத்தி
மூங்கில் துளையில் அதை நிரப்பி
காற்றலையில் பிரசவித்தான்

இரைச்சல்களின் இடையினிலும்
இவன் இசைப்பது ஓயவில்லை
இரைப்பையின் சமிஞைகளும்
இவன் இயக்கத்தை நிறுத்தவில்லை

நெரிசல்களின் மத்தியிலும்
உயிரிசை அது உன்னதமே
விரிசல்களும் கூடிக்கொள்ளும்
இசைக்கு அது சாத்தியமே

கதிரவனும் இசைகேட்டு
தன் சூடினைதான் தனித்துக்கொண்டான்
தென்றலுமே முத்ததெடுக்க
அவன் உடலை தழுவிக் கொண்டான்

இசை கக்கும் இவனுக்கோ
குழல் விற்பது நோக்கமில்லை
குழல் விற்பது நடந்தேறின்
இல்லாளும் குழல் இசைப்பாள்
இவன் குழலோ செவிக்குணவு
அவள் குழலோ வயிற்றுக்கு

படம்: ஓவியர் ரவி

https://www.facebook.com/ravi.artist.98