போர்க்களம்

காலம் மாற்றுமெனவும்
மறக்கச்செய்யுமெனவும்
சொல்லிக்கொண்டு தான் இருக்கிறார்கள்

புத்தகங்களில் மூழ்கு
இசையில் தொலைந்து போ
தியானத்தில் நிலைபடு என்றனர்

பயப்பட தேவையில்லையெனவும்
பாதுகாப்பாய் இருப்பதாகவும்
மீண்டும் நிகழாதெனவும் சொல்கின்றனர்

சங்கடம் மறக்கச் சொல்லி
சந்தோஷமாய் இருக்கச் சொல்லி
சமாதானங்கள் உரைக்கின்றனர்

அனால் வீட்டை விட்டு வெளியே
வீதியில் கால் வைத்தாலே
பீதியும் தொற்றிக்கொள்கிறது

இயற்கையாகவே கழுத்து
வலது பின்புறம் திரும்புகிறது
கண்கள் அங்கும் இங்கும் ஓடுகிறது

மீசையுள்ள முகங்களெல்லாம்
மிருகமாகவே தோன்றுகிறது
மனதும் பயத்தில் நீந்துகிறது

கூட்டமுள்ள பேருந்து பயம்
தனியான சாலை அதிக பயம்

தெரியா விலாசத்திற்கு ஆட்டோவும்
தெரிந்த அலுவலக மகிழுந்தும் பயம்

அதிகாலை வேளையும்
நள்ளிரவு சாலையும் பயம்

திரையரங்கு இருட்டும்
திருவிழா வெளிச்சமும் பயம்

நிறைந்த அரங்கமும்
ஆளில்லா சுரங்கமும் பயம்

தெரிந்த இடத்தில் தெரியா பயம்
தெரியா இடத்தில் அனைத்தும் பயம்

பயத்தினை வென்றிட முயற்சிகள் எடுத்ததுமே
பயமே முந்திப்போய் முயற்சிகள் தோற்க்குதே

ஒவ்வொரு கணமும் பயத்துடன் நகரவே
ஒவ்வொரு நாளும் போர்க்களம் ஆகுதே